السلام جايب اليوم قصيدة للشاعر يوسف العتيبي ألقيت في مسابقة شاعر المليون بأبوظبي
ترد القصايـد ردة البـل علـى المقهـور
ليا صاح صياح المعانـي بـراس القـور
تحوّل و ترقى مع ضلوعي و احـس بهـا
تدرهم بصدري مثـل درهامـة المظهـور
تدرهم بصدري ليـن تـورد علـى قلبـي
و إذا صدرت .. ما مثل هاك الشعور شعور
أدور علـى بيـوت الجزالـة و أوسمهـا
و لا أوسم الواقف و لا أوسـم المكسـور
لأن القصيـدة فكـرة إبـداع شاعـرهـا
و لا ينبت الإبداع بأرض الخيـال البـور
و أنا شاعر و مبدع و أمثل بنـي عمـي
مثل ما يمثـل يـام شاعرهـم المشهـور
مثل ما حضـرت أول و أجازتنـي اللجنـة
أبامتـع اللجنـة .. و ابامتـع الجمهـور
و لانـي بمـن لطامـة العايـل عتيـبـة
إذا ما ضحك تركي و لا صفـق الدكتـور
تمـر فخيالـي بعـض الأفكـار و أكتبهـا
مثل ما يمر من الزجاجـة شعـاع النـور
و أنا لي جوانـب فكرتـي يـوم أكملهـا
يصير الورق عش القلم و القلم عصفـور
كبرنـا و شفنـا و الليـالـي عرفنـاهـا
توافيق .. و حظوظ الرياجيـل تلعـب دور
و أنا قـادر آغنـي معاهـم و أشاركهـم
و حظي معاهم طيـب و لا عليـه قصـور
و لكن أنا فـي بعـض الأحيـان تلقانـي
أحاول أحس إحساس أبو جعفر المنصـور
لو إنه يجي و يشوف بغداد وش صـارت
سماها كفن للنـاس .. و ترابهـا كافـور
وأنقل لكم هنا والتي ألقاها في الحلقة الأخيرة من برنامج شاعر المليون، القصيدة التي ألهبت الجماهير .. قصيدة توزع الجمهور فيها إلى نصفين نصف وقف يصفق بحراره .. ونصف جلس يبكي بحرقة ومرارة ...
يافكري المشغـول للشعر ميعـاد
خلك معي ساعات والوقت محدود
أنا هنا بين علـى روس الأشهـاد
موجود في الصورة ولانيب موجود
تسري بي الأفكار وأغيـب وأنقـاد
أرحل عن الواقـع ولاودي اعـود
هنا كسبت إعجاب أحبـه وحسـاد
وهناك لي موطن وتاريخ وحـدود
مانيب ناسٍ صبح بغـداد الأمجـاد
اللي حجب شمسه من الظلم بارود
أربع سنين وحـزن بغـداد يـزداد
ساعاتهـا ونـات وأيامهـا سـود
وإن كان في التاريخ صورة لبغداد
هذي شوارعها عصابـات وجنـود
فيها العباد اجسـاد وثيابهـا لحـاد
والموت بالمرصاد والرزق للـدود
في مشهدٍ مايوم مـا هـوب ينعـاد
ومأساتها من زود في زود في زود
الموت لو يرضي بشاعات الأحقاد
هو أهون أهوالن تخلي الولد عـود
ياخـادم البيتيـن ياذخـر الأسيـاد
ياللي برايك صامل الراي معقـود
يالحاكم العادل ويالصـارم الحـاد
يامزبّن المضهود يالشامـخ الطـود
لك سيرة أمجادٍ قديمـات وجـداد
يفوح منها زاكي المسـك والعـود
ولك حكمةٍ تلجم شياطين الأضـداد
ولك هيبةٍ يخضع لها كـل نمـرود
واليا ادلهم الخطب والعزم به بـاد
لك وقفة يفرح بها كـل مضهـود
ياسيف الأمة كـان للحـق ميـلاد
إن ما انولد من سيف ماهوب مولود
قدامـك المنظـر ثلاثـي الأبعـاد
مكشوف للعالم ولاهـوب مجحـود
على يدك توحيد صف أمة الضـاد
وأنت الأمل لاقالوا الصبر محمـود
ياقادة الأمـة نبـي منكـم إنجـاد
ضاعت علينا وقتنا أغـلال وقيـود
شعبٍ يعيش الغبـن ويـذل ويبـاد
قتيـل ومشـرد ولاجـي ومفقـود
تنخاكم آهـات الثكالـى بالأصفـاد
وطريق مجـدٍ بالملمـات مسـدود
تنخاكم الآمـال وأمجـاد الأجـداد
اللي لها معكـم مواثيـق وعهـود
اتمنى ان القصائد اعجبتكم
تقبلوا خالص تحياتي
الجمعة نوفمبر 23, 2007 4:12 am